آسٹریلیا کو تین بار ورلڈکپ جتوانے والے سابق کپتان رکی پونٹنگ نے چیمپئینز ٹرافی کی دو فائنلسٹ ٹیموں سے پاکستان کو نکال باہر کیا۔
سابق آسٹریلوی کرکٹر نے میگا ایونٹ کے فائنل سے میزبان پاکستان کو خارج کرتے ہوئے پیشگوئی کی ہے کہ بھارت اور آسٹریلیا ایونٹ کی دو فائنلسٹ ٹیمیں ہوسکتی ہیں۔
آئی سی سی ریویو میں اظہار خیال کرتے ہوئے رکی پونٹنگ نے کہا کہ آسٹریلیا اور بھارت کی ٹیموں میں کوالٹی پلیئرز ہیں، ان ٹیموں کی حالیہ تاریخ اور آئی سی سی ایونٹس میں کارکردگی سب کچھ واضح کرتی ہے۔
انہوں نے کہا کہ بھارت اور آسٹریلیا کو فائنلسٹ ٹیموں کیلئے نظر انداز نہیں کیا جاسکتا جبکہ میزبان پاکستان بھی بڑا چیلنج ثابت ہوسکتی ہے۔
سابق آسٹریلوی کپتان نے کہا کہ گزشتہ کچھ ماہ سے گرین شرٹس کی ٹیم ون ڈے فارمیٹ میں زبردست کرکٹ کا مظاہرہ کررہی ہے لیکن پھر بھی بڑے ٹورنامنٹ میں پاکستان کے بارے میں زیادہ پیشگوئی نہیں کی جاسکتی۔
ادھر سابق بھارتی کرکٹر و کمنٹیٹر روی شاستری نے بھی بھارت اور آسٹریلیا کے فائنل میں پہنچنے کی پیشگوئی کی ہے تاہم انکا کہنا ہے کہ بھارت کو روایتی حریف کیخلاف سخت مقابلہ درپیش ہوگا۔